राज्यातील संपूर्ण शिक्षकवर्ग संपावर...तरीही शाळा बंद न ठेवण्याचे शासकीय आदेश

 मागील वर्षी, अनुदानित शाळांसाठी वाढीव आर्थिक अनुदानाच्या मागणीसाठी शिक्षक आणि कर्मचाऱ्यांनी 1 ऑगस्ट 2024 पासून 75 दिवस राज्यव्यापी निदर्शने केली. त्यावेळी सरकारने सकारात्मक प्रतिसाद दिला होता. 10 ऑक्टोबर 2024 रोजी तत्कालीन मुख्यमंत्र्यांच्या अध्यक्षतेखाली झालेल्या मंत्रिमंडळ बैठकीत अनुदानित शाळांना अनुदानाचा पुढील हप्ता देण्याचे आश्वासन देण्यात आले होते.  मात्र 14 ऑक्टोबर 2024 रोजी जारी केलेल्या अधिकृत सरकारी ठरावात निधी वाटप करण्यात शासनाने पुन्हा शिक्षकांच्या मागण्यांना हरताळ फासला. त्यामुळे महाराष्ट्रातील संपूर्ण शिक्षणक्षेत्रातील कर्मचाऱ्यांमध्ये प्रचंड नाराजी पसरली आहे. एक वर्षानंतरही अनुदान आणि लाभांच्या प्रलंबित मागण्या पूर्ण होत नसल्याने हजारो शिक्षक आणि शिक्षकेतर कर्मचाऱ्यांनी सरकारविरोधात एल्गार पुकारला आहे.  राज्यातील हजारो शिक्षक आणि शिक्षकेतर कर्मचाऱ्यांनी 8 आणि 9 जुलै संपावर जाण्याचा निर्णय घेतला आहे. राज्याचे पावसाळी अधिवेशन सुरू आहे. यावेळी राज्यातील विविध शाळांमधील हजारो शिक्षक मुंबईतील आझाद मैदानात एकत्र येत सरकारचे लक्ष वेधणार आहे. 

  8 आणि 9 जुलैला राज्यातील शिक्षक समन्वय संघाने राज्यातील शाळा बंद करण्याचा निर्णय घेतला होता. त्यामुळे या दिवशी राज्यातील शाळा बंद असणार की नाही याबद्दल पालक आणि विद्यार्थीवर्गात संभ्रम होता. पण राज्यातील शिक्षण विभागाने आदेशाद्वारे हे  स्पष्ट केले आहे की, 8 जुलै मंगळवार आणि 9 जुलै बुधवारी राज्यातील शाळा बंद राहणार नाही.  माध्यमिक व उच्च माध्यमिक संचालक महेश पालकर यांनी हा आदेश काढला आहे. त्यामुळे पालकांनी आणि विद्यार्थ्यांनी लक्षात घ्यावे की, 8 आणि 9 जुलैला शाळा असणार आहेत.