पत्रकारितेच्या इतिहासात आपला स्वतंत्र ठसा उमटवणाऱ्या मुंबई मराठी पत्रकार संघाच्या वतीने आता पत्रकार भवनामध्ये नाट्च शुक्रवार या नवीन सांस्कृतिक उपक्रमाची सुरुवात होत आहे. याची अधिकृत घोषणा आज प्रसिद्धी माध्यमांच्या उपस्थितीत करण्यात आली. दर महिन्याच्या चौथ्या शुक्रवारी प्रायोगिक नाटकांचे मोफत सादरीकरण पत्रकार भवन येथे होणार आहे. नवोदित व प्रायोगिक रंगकर्मीसाठी हा रंगमंच खुला असून, नाट्यप्रेमींना याचा निःशुल्क आनंद घेण्याची संधी यातून मिळणार आहे. मात्र ज्यांना ऐच्छिक मदत द्यायची असेल त्यांनी जरूर मदत करावी. त्यांसाठी दानपेटी उपलब्ध असणार आहे. असे संघाचे अध्यक्ष संदीप चव्हाण यांनी पत्रकार परिषदेत स्पष्ट केले. लोकमान्य सभागृहात पार पडलेल्या पत्रकार परिषदेत मुंबई मराठी पत्रकार संघाचे अध्यक्ष संदीप चव्हाण यांच्यासह विश्वस्त देवदास मटाले, मी भारतीय या दीर्घाकाचे निर्माते, दिग्दर्शक आणि अभिनेता रविंद्र देवधर, पत्रकार संघाच्या उपाध्यक्षा स्वाती घोसाळकर, कार्यवाह शैलेंद्र शिर्के उपस्थित होते. .
याबाबत अधिक माहिती देतांना संदिप चव्हाण पुढे म्हणाले, ‘मराठी प्रायोगिक रंगभूमीला बळ देणं आणि नव्या प्रयोगशील नाटकांना मंच मिळवून देणं, हा ‘नाट्य शुक्रवार’ उपक्रमाचा मूळ हेतू आहे. पत्रकार संघ केवळ पत्रकारांसाठीच नव्हे तर समाजातील उपक्रमशील घटकांसाठीही एक प्रेरणास्थान असावं, यासाठी आम्ही कटिबद्ध आहोत.’ या उपक्रमाला ‘इंडियन ऑईल’चे प्रायोजकत्व लाभले असून या उपक्रमात सादरीकरण करणार्या नाट्यसंस्थेला पत्रकार संघातर्पे १० हजार रुपयांचे अनुदानही देण्यात येणार आहे. तसेच संघाचे सभागृह पूर्णतः मोफत उपलब्ध करून देण्यात येणार आहे, या नाट्य शुक्रवार उपक्रमाचे संचलन करण्यासाठी पत्रकार संघाचे विश्वस्त देवदास मटाले यांच्या नेतृत्वाखाली रविंद्र देवधर आणि नयना रहाळकर यांची समिती स्थापन करण्यात आली असून, नाट्य शुक्रवार अंतर्गत प्रायोगिक रंगभूमीची नाटके स्वीकारण्याचा अंतिम निर्णय ही समिती घेईल, अशा तऱ्हेने या अभिनव संकल्पनेचा तपशीलवार परिचय अध्यक्ष संदीप चव्हाण यांनी करून दिला.
'नाट्च शुक्रवार' कार्यक्रमाचा शुभारंभ २५ जुलै २०२५ रोजी सायं. ५.०० वा. मी भारतीय या दीर्घांकाने होणार आहे. यावेळी प्रसिद्ध अभिनेते अरुण नलावडे, प्रसिद्ध अभिनेते संजय मोने आणि प्रसिद्ध दिग्दर्शक-लेखक मिलिंद पेडणेकर तसेच इंडियन ऑईलचे कॉर्पोरेट कम्युनिकेशनचे महाव्यवस्थापक डॉ. अभिषेक कुमार यांची प्रामुख्याने उपस्थिती असणार आहे. असे विश्वस्त देवदास मटाले यांनी सांगितले. तसेच 'नाट्य शुक्रवार' हा एक प्रकारे सांस्कृतिक लोकचळवळीचा आरंभ असून, पुढील काही महिन्यांत या उपक्रमाची व्याप्ती वाढवण्याचाही मानस मटाले यांनी व्यक्त केला.
मुंबई मराठी पत्रकार संघाने सुरु केलेला हा ‘नाट्य शुक्रवार’ उपक्रम स्तुत्य असून महाराष्ट्रातील विविध सामाजिक संस्थांसाठी पथदर्शी असल्याचे रविंद्र देवधर म्हणाले. तर या नाट्यउपक्रमात मुंबईसोबतच महाराष्ट्रातील ग्रामीण भागातील नाट्यकलाकारांना एक हक्काचे व्यासपीठ मिळणार असल्याचे नयना रहाळकर म्हणाल्या. या नाट्य उपक्रमात ज्यांना आपल्या कलाकृती सादर करायच्या आहेत, त्यांनी देवदास मटाले (९७६९६६४४६४), रविंद्र देवधर (९४२२३४४५५५) आणि नयना रहाळकर (९३२२४९२६२९) यांच्याशी संपर्क साधावा. तसेच या उपक्रमास नाट्यरसिकांनी मोठ्या प्रमाणात उपस्थित रहावे, असे आवाहन संघाचे कार्यवाह शैलेंद्र शिर्वे यांनी केले. तर उपस्थित मान्यवरांचे आभार संघाच्या उपाध्यक्षा स्वाती घोसाळकर यांनी मानले
0 टिप्पण्या