मुंबईकर नागरिकांना स्वच्छ आणि ताजे अन्न मिळावे त्यासोबतच भेसळयुक्त, दूषित, आरोग्यास हानी पोहचविणाऱ्या अन्न सेवनापासून परावृत्त करण्यासाठी बृहन्मुंबई महानगरपालिकेने पुढाकार घेतला आहे. त्याकरिता महानगरपालिकेचा अनुज्ञापन विभाग आणि भारतीय अन्न सुरक्षा व मानक प्राधिकरण (FSSAI) यांच्या संयुक्त विद्यमाने स्त्यावर खाद्यपदार्थ विक्री करणाऱ्या विक्रेत्यांना अन्न सुरक्षा आणि स्वच्छ्तेचे प्रशिक्षण दिले जाणार आहे. या प्रशिक्षणाचे पहिले सत्र आज के पूर्व विभाग कार्यालयात पार पडले. अन्न सुरक्षेचे महत्त्व, वैयक्तिक स्वच्छता, खाद्य विक्री आणि साठवणूक ठिकाणांची नियमित स्वच्छता, अन्न शिजवणे किंवा पाककृती करणे, कचरा व्यवस्थापन आणि अन्न सुरक्षा व मानके याचे धडे खाद्य विक्रेत्यांना देण्यात आले.
बृहन्मुंबई महानगरपालिका आणि भारतीय अन्न सुरक्षा व मानक प्राधिकरण यांच्या संयुक्त विद्यमाने नियमित अंतराने महानगरपालिका प्रभाग कार्यालयांमध्ये वर्षभर प्रशिक्षण सत्रे आयोजित करण्यात येणार आहेत. यामध्ये मुंबईकर नागरिकांना स्वच्छ आणि ताजे अन्न पुरवावे यावर भर देऊन खाद्य पदार्थ विक्रेत्यांना प्रशिक्षण देण्यात येईल. अन्न सुरक्षा व मानके (अन्न व्यवसायांचे परवाना आणि नोंदणी) नियम, २०११ च्या अनुसूची ४ नुसार खाद्य विक्रेत्यांना मुलभुत स्वच्छता पद्धती शिकविण्यात येतील. त्यासोबतच विक्रेत्यांना जनजागृतीपर वाचन साहित्य वितरित करण्यात येईल. प्रशिक्षण सत्रांसाठी पात्र प्रशिक्षक व विषय तज्ज्ञांची नेमणूक करण्यात आली आहे. या प्रशिक्षण कार्यक्रमांची परिणामकारकता तपासणी व मूल्यमापन केले जाणार आहे. प्रशिक्षण घेतलेल्या खाद्य पदार्थ विक्रेत्यांना भारतीय अन्न सुरक्षा व मानक प्राधिकरण यांच्या वतीने प्रमाणपत्रंदेखील देण्यात येतील.
0 टिप्पण्या