ठाणे जिल्ह्याने मागील काही वर्षांत विकासाची मोठी झेप घेतलेली दिसत आहे. अगदी दळणवळण, रस्ते, वाहतूक, हॉस्पिटल्स आदी विभागात चौफेर कामं सुरू आहेत. ठाणे शहराचे पाहाल तर 25 वर्षांपूर्वीचे ठाणे आणि आजचे ठाणे यात जमीन अस्मानाचा फरक पडला आहे. ठाण्यात दोन नाट्यगृह आहेत, तिसरा कळव्यातील नाट्यगृहाची तयारी चालू आहे. दादोजी कोंडदेव स्टेडियमने कात टाकली आहे. याठिकाणी फाइव्ह स्टार हॉटेलच्या कामाच्या निविदा प्रक्रिया सुरु आहे. घोडबंदरात बोरीवडेत नव्या स्पोर्ट क्लबची जमवाजमव सुरू झाली आहे. इतके सगळे असले तरी एका सशक्त शहराची सांस्कृतिक भूक भागविण्यासाठी किमान एका साहित्य, वास्तू, वस्तू संग्रहालयाची गरज असते.
नाही म्हणायला ठाण्यातील हाजूरी येथे डॉ. विजय बेडेकर यांच्या मार्गदर्शनाखाली प्राच्य विद्या अभ्यास संस्थेचे काम चालू आहे. याठिकाणी भारतीय संस्कृती, इतिहास, भाषा, विविध लिपी यांचा अभ्यास आणि संशोधन केले जाते. या संस्थेकडून कधी कधी प्रदर्शने देखील भरवली जातात. सगळ्यात महत्त्वाचे म्हणजे याठिकाणी अनेक दुर्मिळ, प्राचीन मूर्ती, शिलालेख, वस्तू आहेत. जवळपास 30 हजार संदर्भ ग्रंथ आणि साडे तीन हजार पोथ्या आणि दुर्मिळ हस्तलिखिते असा मौल्यवान ऐवज आहे. मात्र हे ना ठाणेकरांना माहीत आहे ना पर्यटकांना. याच प्राच्य विद्या अभ्यास संस्थेला सोबत घेऊन ठाण्यात एक मोठं आंतरराष्ट्रीय संग्रहालयाची निर्मिती व्हायला हवी. ठाण्यातील प्राचीन सिद्धेश्वर तलावात सापडलेल्या मूर्ती, टाऊन हॉल येथे असलेली सामुग्री, पावणे दोनशे वर्षांपूर्वीचे ठाणे नगर वाचन मंदिर, मराठी ग्रंथ वाचनालय यांची देखील मदत होईल.या संग्रहालयामुळे केवळ ठाण्याचे पर्यटन बहरणार नाही तर ठाण्याचे नाव जगाच्या नकाशावर अधिक प्रभावी ठरेल.
जयदास मोरे
0 टिप्पण्या