कळवा येथील नाट्यगृहासाठी आवश्यक असलेल्या जागेपैकी ५० टक्के जागा ठाणे महानगरपालिकेच्या ताब्यात आहे. उर्वरित जागेच्या ताब्यासाठी विकास आराखड्यातील आरक्षणानुसार जागा ताब्यात घेण्यास परवानगी देण्याची विनंती न्यायालयात करण्यात आल्याची माहिती शहर विकास विभागाने दिली. या नाट्यगृहाच्या आराखडा तयार करण्याचेही काम सुरू असून तो पुढील आठवड्यात सादर करण्यात येणार आहे.
या प्रकल्पात खाजगी-सार्वजनिक सहभाग किंवा विकासकाच्या माध्यमातून बांधकाम असे दोन पर्याय आर्थिक सल्लागारांनी सुचवले आहेत. त्याबद्दल निर्णय घेताना महापालिकेचा जास्तीत जास्त फायदा आणि विकासकासाठी प्रकल्पाची व्यवहार्यता या दोन्ही गोष्टीची सांगड घालणे आवश्यक आहे. म्हणूनच ईओआय मागून प्रकल्पात रस असलेल्या विकासकांची भूमिका कशी असेल हे जाणून घेणे महत्त्वाचे ठरणार आहे. त्याचबरोबर कोलशेत बाळकुम परिसरात तयार करण्यात येणाऱ्या टाऊन पार्क प्रकल्पा संदर्भातही या बैठकीत आढावा घेण्यात आला. टाऊन पार्क हा विज्ञान केंद्र, मत्स्यालय, मत्स्य वारसा केंद्र आणि तारांगण यांच्यासह व्यावसायिक वापराच्या जागेचा विकास असा सुमारे २६०० कोटी रुपयांचा प्रकल्प आहे. या प्रकल्पाची आर्थिक व्यवहार्यता तपासून तसेच राज्य शासनाकडून आवश्यक परवानगी घेऊन पुढे जाण्याचा जाण्याचे निर्देश आयुक्त राव यांनी दिले आहेत.
कळवा येथील तरण तलावाच्या धोकादायक इमारतीचे निष्कासन सार्वजनिक बांधकाम विभागाने सुरू केले आहे. तसेच, या क्षेत्राचे सर्वेक्षण शहर विकास विभागाने पूर्ण केले आहे. या प्रकल्पाचा आराखडा तयार करण्याचे काम वास्तू विशारदामार्फत सुरू आहे. हा आराखडा सोमवारी सादर करावा, तसेच आरक्षण बदलाच्या प्रस्तावाला महासभेची तसेच शासनाची मान्यता घेण्याची प्रक्रिया तातडीने करावी, अशा सूचना आयुक्त राव यांनी दिल्या.
0 टिप्पण्या