बृहन्मुंबई महानगरपालिकेच्या एन विभाग कार्यालयाच्या वतीने घाटकोपर (पश्चिम) रेल्वे स्थानकाला समांतर असलेल्या झुनझुनवाला महाविद्यालय ते रामरहिम मंत्र मंडळदरम्यानचे रस्ते व पदपथावरील ४३ अनधिकृत शेड आणि अतिक्रमणांवर काल (दिनांक ४ फेब्रुवारी २०२५) निष्कासनाची कारवाई करण्यात आली. बृहन्मुंबई महानगरपालिका आयुक्त तथा प्रशासक. भूषण गगराणी यांच्या निर्देशांनुसार, अतिरिक्त महानगरपालिका आयुक्त (शहर) डॉ. (श्रीमती) अश्विनी जोशी यांच्या मार्गदर्शनात अतिक्रमण तसेच अनधिकृत बांधकामांविरोधात कारवाई करण्यात येत आहे.
एन विभागातील घाटकोपर (पश्चिम) रेल्वे स्थानकाला समांतर असलेल्या झुनझुनवाला महाविद्यालय ते रामरहिम मित्र मंडळ या परिसरात अनेक वर्षांपासून असलेला नाईलाजाने देहविक्रय करणाऱ्यांचा परिसर (रेड लाईट एरिया) हटविण्याबाबत नागरिकांकडून तक्रारी प्राप्त झाल्या होत्या. याच पार्श्वभूमीवर, उप आयुक्त (परिमंडळ-६) श्री. संतोषकुमार धोंडे यांच्या मार्गदर्शनात आणि सहायक आयुक्त (एन विभाग) श्री. गजानन बेल्लाळे यांच्या नेतृत्वात दिनांक ३ आणि ४ फेब्रुवारी २०२५ या कालावधीदरम्यान निष्कासनाची मोहीम हाती घेण्यात आली. त्यानुसार, या परिसरातील रस्ते व पदपथावर असलेले ४३ अतिक्रमण आणि अनधिकृत शेड्स निष्कासित करुन रस्ता व पदपथ मोकळा करण्यात आला. या कारवाईदरम्यान महानगरपालिकेचे अधिकारी-कर्मचारी यांच्यासह पुरेसा पोलिस बंदोबस्त ठेवण्यात आला होता.
0 टिप्पण्या