उत्तन येथे बनणार मिरा भाईंदरचे आरटीओ उपकेंद्र

 मिरा भाईंदर महापालिकेतील वाढती लोकसंख्या पाहता मिरा भाईंदरमध्ये आरटीओचे उपकेंद्र उभारण्यात येणार आहे, त्यासाठी उत्तन येथे ९ हजार ७०० मीटर जागा महसूल खात्याकडून उपलब्ध करून देण्यात येणार आहे. उत्तन येथे मिरा भाईंदरच्या नागरिकांसाठी स्वतंत्र आरटीओचे कार्यालय उभारणार असल्याचे आज परिवहन मंत्री प्रताप सरनाईक यांनी बैठकीत सांगितले.  एसटी महामंडळ, आरटीओ आणि मिरा भाईंदर महापालिकेच्या अधिकाऱ्यांसोबत परिवहन मंत्री  प्रताप सरनाईक यांच्या अध्यक्षतेखाली महत्त्वाची बैठक घेण्यात आली. यावेळी मिरा भाईंदर महापालिकेचे आयुक्त संजय काटकर, महाराष्ट्र राज्य परिवहन महामंडळाचे व्यवस्थापकीय संचालक माधव कुसेकर, परिवहन आयुक्त विवेक भीमनवार यांच्यासह इतर अधिकारी उपस्थित होते. 

  भाईंदर पश्चिम येथे एसटी महामंडळाची फार मोठी जागा आहे.त्यातील काही जागा ही सीआर झेड क्षेत्रात येते. त्यापैकी ७ हजार ४०० मीटरची जागा आहे, त्या जागेवर बांधकाम करू शकतो . एसटी महामंडळाच्या ७ हजार ४०० मीटरची जागा ही मिरा भाईंदर महापालिका विकसित करेल. त्यातील ५० टक्के जागा ही मिरा भाईंदर पालिकेला त्यांच्या मालिकीची म्हणून ६० वर्षाच्या लीजवर देण्याचा निर्णय आजच्या बैठकीत घेण्यात आल्याचा प्रताप सरनाईक यांनी सांगितले. या ठिकाणी महापालिकेने मच्छी मार्केट सुरु करावे. उत्तनच्या मच्छीमार बांधवांची मागणी होती त्यांना भाईंदर येथे मच्छी मार्केट हवे आहे. हे मच्छी मार्केट एअर कंडिशन असणार आहे.

उरलेल्या ४० टक्के जागेत आरटीओ कार्यालय आणि एसटी महामंडळाची सुसज्ज कर्मशिअल इमारत उभारण्यात येईल. याठिकाणी पार्किंग, कार्यालय, कर्मचाऱ्यांसाठी ऑफिस, चार्जिंग स्टेशन आदी गोष्टींची पूर्तता करण्यात येईल. यासाठी १३६ कोटी रुपयांचा खर्च अपेक्षित आहे. यातील काही खर्च हा मिरा भाईंदर महापालिका करणार आहे आणि काही खर्चासाठी राज्य शासनाला विनंती करणार आहोत, अशी माहिती परिवहन मंत्री महोदयांनी दिली. एसटी महामंडळ, आरटीओ आणि मिरा भाईंदर महापालिकेतर्फे एसटी कर्मचारी आणि नागरिकांना सुविधा देण्यासाठी एकत्रितपणे काम करेल.

भाईंदर पश्चिम येथील एसटी महामंडळाचे कार्यालय आणि मच्छी मार्केटसाठी लवकरात लवकरात राज्य शासनाची परवानगी घेऊन पुढील एक दोन महिन्यात मा. मुख्यमंत्री व मा. उपमुख्यमंत्री यांच्या हस्ते या जागेचे भूमिपूजन करण्यात येईल,  ८० हजार मीटरच्या एसटी महामंडळाच्या जागेत पार्किंग प्लाझाची ही सुविधा असणार आहे. स्टेशन पासून बस स्थानक जवळ असल्याने तेथे नागरिकांसाठी पे आणि पार्कींगची सुविधा उपलब्ध करून देण्यात येईल, अशी माहिती प्रताप सरनाईक यांनी दिली.