भाजपचे केंद्रीय मंत्री नारायण राणे यांच्या विरोधात ठाण्यातही गुन्हा दाखल

ठाणे- : मुख्यमंत्री हे घटनात्मक पद असून केंद्रीय मंत्री नारायण राणे यांनी राजशिष्टाचाराचा अवमान केला आहे. महाराष्ट्राचे मुख्यमंत्री उद्धव ठाकरे यांच्याबद्दल अपशब्द वापरुन नारायण राणे यांनी मराठी अस्म‍ितेचा अपमान केला आहे. त्याचे हे बेताल वक्तव्य जनतेमध्ये तेढ निर्माण करणारे असून याचा निषेध व्यक्त करीत त्यांच्या विरोधात ठाण्यातील शिवसैनिकांनी आंदोलन करुन नौपाडा पोलीस ठाण्यात गुन्हा दाखल केला. यावेळी खासदार राजन विचारे, मिनाक्षी शिंदे, स्थायी समिती सभापती संजय भोईर, सभागृह नेते अशोक वैती, ठाणे शहरप्रमुख रमेश वैती, ठाणे विधानसभा संघटक हेमंत पवार, उपमहापौर पल्लवी कदम, नगरसेवक राम रेपाळे, युवा सेना विस्तारक राहूल लोंढे, महिला आघाडीच्या स्म‍िता इंदुलकर, यांच्यासह ठाण्यातील शिवसेनेचे पदाधिकारी व शिवसैनिक मोठ्या संख्येने उपस्थित होते. अशी माहिती शिवसेना जिल्हाप्रमुख व ठाणे शहराचे महापौर नरेश म्हस्के यांनी दिली.

   23 ऑगस्ट रोजी महाड येथे केंद्रीय मंत्री नारायण राणे यांनी महाराष्ट्राचे मुख्यमंत्री उद्धव ठाकरे यांच्यावर व्देषापोटी बेताल वक्तव्य केले आहे. त्यामुळे संपूर्ण महाराष्ट्रात याचा निषेध व्यक्त केला जात आहे. शिवसेना ठाणे‍ जिल्हाप्रमुख नरेश म्हस्के यांच्या नेतृत्वाखाली आज नौपाडा पोलीस ठाण्यात नारायण राणे यांच्याविरोधात तक्रार दाखल करुन घटनात्मक पदाचा अवमान केल्याबद्दल त्यांना तातडीने अटक व्हावी अशी मागणी करत गुन्हा दाखल करण्यात आला आहे. ठाण्यामध्ये संघर्ष व तणावाचे वातावरण निर्माण होवू नये  तसेच त्यांच्या वक्तव्यामुळे राजशिष्टाचाराचा भंग झाला असल्याने आम्ही गुन्हा दाखल करीत असल्याचे शिवसेना ठाणे जिल्हाप्रमुख नरेश म्हस्के यांनी सांगितले. यावेळी ठाण्यातील भारतीय जनता पक्षाच्या कार्यालयावर जाब विचारण्यासाठी शिवसैनिकांचा मोर्चा घोषणा देत जात असतानाच पोलीस उपायुक्त अविनाश अंबुरे यांनी मोर्चा अडविला, यावेळी शिवसैनिकांनी गुन्हा दाखल करण्याची मागणी केली,त्यानंतर पोलीसांनी गुन्हा दाखल केल्यानंतर शिवसैनिकांनी संयमानी हा मोर्चा विसर्जित केला.

 राणे यांच्या विरोधातील आंदोलना दरम्यानच्या घोषणेमुळे महापौर म्हस्के आज चांगलेच अडचणीत आले. मुख्यमंत्र्यांबद्दल काढलेल्या अनुद्गारामुळे नारायण राणे आणि शिवसेनेत सध्या जोरदार संघर्ष सुरू झाला आहे. ठाण्यातही या विरोधात आंदोलन करत असताना महापौरांनी केलेल्या चुकीच्या घोषणेमुळं महापौर चांगलेच अडचणीत आले. पांचपाखाडी येथील तीनटाकी येथे नारायण राणे यांच्या विरोधात घोषणाबाजी करताना नारायण राणे अंगार है असं म्हटले आणि त्यांच्याबरोबरच्या शिवसैनिकांनी बाकी सब भंगार है अशी घोषणा दिली. ही बाब लक्षात येताच हा व्हीडीओ व्हायरल करण्यात आला. महापौरांनाही हा व्हीडीओ व्हायरल झाल्याचं लक्षात आलं आणि आता अडचण होऊ शकते हे समजल्यावर आंदोलनाचा धसका घेऊन हा व्हीडीओ खोडसाळपणे तयार करण्यात आल्याचा खुलासा महापौरांनी तातडीनं केला. मात्र व्हायरल झालेल्या व्हीडीओमध्ये महापौरांची घोषणा स्पष्टपणे दिसत आहे.

ठाण्यातही भारतीय जनता पक्षाच्या कार्यालयावर दगडफेकीचा प्रयत्न करण्यात आला. भारतीय जनता पक्षाच्या विविध कार्यालयांवर हल्ले झाले. नाशिक, पुणे पाठोपाठ ठाण्यातील खोपट कार्यालयावरही हल्ला करण्याचा प्रयत्न करण्यात आला. मात्र हल्ला करून हल्लेखोर पळून गेले. खोपट येथील भारतीय जनता पक्षाच्या कार्यालयावर पोलीसांनी बंदोबस्त ठेवला होता. हल्ला झाल्याचं पाहून पोलीसांनीही हल्लेखोरांना पकडण्याचा प्रयत्न केला पण हल्लेखोर वाहनांवरून पळून गेले. त्यानंतर भारतीय जनता पक्षाच्या कार्यकर्त्यांनी लाठ्याकाठ्या घेऊन कार्यालयाबाहेर येऊन घोषणाबाजी केली. या हल्ल्यानंतर पोलीसांनी पक्षाचं कार्यालय असलेला खोपट रस्ता दोन्ही बाजूंनी वाहतुकीसाठी बंद केला होता.