Top Post Ad

हे राम... बोगस वेबसाईट द्वारे मंदिरासाठी देणगी, पाच जणांना अटक

 लखनौ –  राम मंदिरासाठी खरेदी करण्यात आलेल्या जमीन व्यवहारात भ्रष्टाचार झाल्याचा मुद्दा अद्यापही चर्चेत  असतानाच  बनावट वेबसाईट तयार करून देणगीच्या नावाखाली रामभक्तांकडून लाखो रुपये उकळल्याचा प्रकार उघडकीस आला आहे.  राम जन्मभूमी ट्रस्ट अयोध्या या नावाने अवैध वेबसाईट सुरू करून लोकांकडून देणगीच्या नावाखाली पैसे उकळणे सुरू असल्याची बाब निदर्शनास आल्यानंतर उत्तर प्रदेश पोलिसांनी यावर कारवाई केली. सोमवारी राम मंदिर उभारणीसाठी देणगी गोळा करणाऱ्यांना अटक करण्यात आली. ही कारवाई नोएडा सायबर पोलीस ठाणे आणि लखनौ सायबर क्राईम मुख्यालयातील पथकांनी संयुक्तपणे केली. पोलिसांनी दिलेल्या माहितीनुसार राम जन्मभूमी ट्रस्ट अयोध्या अशा नावाने आरोपींनी वेबसाईट सुरू केली होती. ही वेबसाईट बेकायदेशीरपणे सुरू करण्यात आली होती. राम मंदिराच्या उभारणीसाठी आर्थिक स्वरुपात योगदान देऊ इच्छिणाऱ्यांसाठी बँकेचा खाते क्रमांक देण्यात आला होता. त्याचबरोबर इतरही माहिती होती, असे पोलिसांनी म्हटले आहे.

बोगस वेबसाईटच्या माध्यमातून आणि राम मंदिराच्या नावाखाली आरोपींनी देणगीदारांकडून किती रुपये उकळले याचा तपास सुरु असून  बनावट वेबसाईट बनवण्याचे बेकायदेशीर कृत्य केल्याप्रकरणी या पाच जणांना अटक करण्यात आली आहे. यामागे आणखी कुणाचा हात आहे. किती मोठे रॅकेट आहे, कोणत्या संस्थेशी यांचा संबंध आहे याचा तपास पोलिस करत असून अटक करण्यात आलेल्यांची ओळख पटवण्यात आली आहे.  आशिष गुप्ता (वय २१), नवीन कुमार सिंग (वय २६), सुमित कुमार (वय २२), अमित झा (वय २४) आणि सुरज गुप्ता (वय २२) अशी आरोपींची नावे असल्याची माहिती पोलिसांनी दिली.  पाच जणांपैकी तीन जण अमेठी जिल्ह्यातील रहिवाशी आहेत, तर दोघे बिहारमधील सीतामढी येथील आहेत.  पाचही जण सध्या नोएडाला लागून असलेल्या पूर्व दिल्लीतील न्यू अशोक नगर परिसरात राहत होते. पोलिसांनी कारवाई केल्यानंतर त्यांच्याकडून पाच मोबाईल जप्त केले. त्याचबरोबर एक लॅपटॉप आणि आधार कार्डच्या ५० प्रतीसह अन्य साहित्य ताब्यात घेतले असल्याचे वृत्त एका हिन्दी वेबसाईटने दिले आहे.


टिप्पणी पोस्ट करा

0 टिप्पण्या

 READ / SHARE  / FORWARD 
JANATA  NEWS  xPRESS

निरंतर सेवेच्या आर्थिक मदतीकरिता 
for Donation
G pay 8108603260 

संपादक: सुबोध शाक्यरत्न  
M : 8108658970

Email- pr.janata@gmail.com