खाजगी रुग्णालयांवर पोलिसांत गुन्हे नोंदविण्याचे निर्देश
मुंबई
कोविड-१९ या संसर्गजन्य आजाराच्या पार्श्वभूमीवर मुंबई महापालिका क्षेत्रातील नागरिकांची होणारी गैरसोय लक्षात घेऊन खासगी 'नर्सिंग होम' (शुश्रुषा गृह, polyclinic इत्यादी), खासगी रुग्णालये वा खासगी दवाखाने सुरु ठेवण्याचे आदेश पालिका प्रशासनाने वारंवार दिले होते. मात्र या आदेशाला या सर्वांनी केराची टोपली दाखवली आहे. यामुळे नागरिकांना वैद्यकीय उपचार मिळण्यात अडचणी निर्माण होत आहेत. अखेर यावर महापालिका आयुक्त इक्बाल सिंह चहल यांनी कठोर भूमिका घेत या खाजगी रुग्णालयांवर पोलिसांत गुन्हे नोंदविण्याचे निर्देश विभागस्तरीय सहाय्यक आयुक्तांना दिले आहेत. त्याचबरोबर जी खासगी रुग्णालये, नर्सिंग होम, दवाखाने सुरू होतील, त्यांना महापालिकेद्वारे ' पीपीई किट ' देण्याचेही निर्देश महापालिका आयुक्तांनी दिले आहेत. व्हिडिओ कॉन्फरन्सिंगद्वारे आयोजित करण्यात आलेल्या एका विशेष बैठकीदरम्यान महापालिका आयुक्तांनी सर्व २४ विभागांच्या सहाय्यक आयुक्तांना हे निर्देश दिले आहेत. या बैठकीला अतिरिक्त महापालिका आयुक्त, सहआयुक्त, उपायुक्त यांच्यासह संबंधित वरिष्ठ अधिकारी उपस्थित होते.
गेल्या सुमारे दोन महिन्यांच्या कालावधीमध्ये महापालिका क्षेत्रातील जी खासगी रुग्णालये, नर्सिंग होम, खासगी दवाखाने बंद आढळून आले आहेत, त्यांना प्रथम सुरू करण्याची विनंती करण्यात आली होती. यानंतर याबाबत वारंवार सूचना व नोटीस देखील देण्यात आल्या होत्या. नोटीस देण्याच्या कार्यवाहीनंतर महापालिका क्षेत्रातील काही खासगी नर्सिंग होम, खासगी रुग्णालये व काही खासगी दवाखाने सुरू झाले. यानुसार सुरू झालेल्या खासगी रुग्णालयांना किंवा खासगी दवाखान्यांना महापालिकेद्वारे 'पी.पी.ई. किट' देखील उपलब्ध करून देण्यात आल्या. तथापि, वारंवार सूचना व नोटीस देऊन देखील अनेक दवाखाने व रुग्णालये सुरू करण्यात आलेली नसून त्यांच्यावर कारवाईचा बडगा उगारण्यात येणार आहे. तसे स्पष्ट निर्देश महापालिका आयुक्तांनी दिले आहेत. सर्व विभागस्तरीय सहाय्यक आयुक्तांनी त्यांच्या क्षेत्रातील बंद असलेली खासगी रुग्णालये, खासगी नर्सिंग होम व खासगी दवाखाने यांची यादी करावी व त्यांच्यावर पोलिसांत गुन्हे दाखल करावे, असे आयुक्तांनी स्पष्टपणे सांगितले.
0 टिप्पण्या