मध्य प्रदेशातील खरगोन जिल्ह्यातील मगरखेडी, कसरावद येथील सेंचुरी यार्न व डेनिम कंपनी शासनाकडून कायदेशीर परवानगी न घेताच बंद केल्यामुळे कामगार रोजगार मिळण्यासाठी सत्याग्रह करत आहेत. १३८८व्या दिवशी रोजगार द्या यामागणी साठी सत्याग्रह सुरू असताना अचानक सकाळी ११ वा.चे सुमारास तीन जिल्ह्यातील पोलिसांनी एकत्रित येऊन श्रमिकांचे धरना स्थळ घेरून हा भ्याड हल्ला केला होता. मिळालेल्या माहितीनुसार पोलिसांनी अचानक धरना स्थळी सेंचुरी श्रमिकांना घेरून जबरजस्ती श्रमिक जनता संघाच्या अध्यक्षा मेधा पाटकर सहित सुमारे ५०० कामगारांना अटक केली आहे. त्यामध्ये सुमारे दीडशे महिला ही आहेत. यामुळे अनेक महिला जखमी झालेल्या अवस्थेत देखील त्यांना अटक करण्यात आली आहे. दरम्यान कंपनीने २९ जून २०२१ रोजी VRS ची नोटीस लावून १५ दिवसात अर्ज मागविण्यात आले होते. परंतु कामगारांनी स्वैच्छा निव्रुत्ती ला नाकारून रोजगारासाठी आग्रह धरला. कंपनी चालवता येत नाही तर कबूल केल्यानुसार श्रमिकांना नाममात्र एक रूपयात कंपनी सहकारी तत्वावर चालवण्यासाठी द्या. अशी मागणी करत मध्य प्रदेश उच्च न्यायालयात आणि सत्याग्रही मार्गाने आंदोलन सुरू आहे. मध्य प्रदेश सरकारने या विषयी मध्यस्थी करून श्रमिकांना न्याय मिळवून देण्यासाठी प्रयत्न न करता कंपनी मालकालाच पाठीशी घालून पोलीसांकरवी कामगारांवर हा निंदाजनक प्रकार केला आहे.
मध्यप्रदेश सरकारच्या हा कामगारद्रोही पोलीसी अत्याचार अमानवीय आणि लोकशाही वर कलंक आहे. सर्व श्रमिकांची ताबडतोब सुटका करावी. अशी मागणी जन आंदोलनांची संघर्ष समितीचे निमंत्रक विश्वास उटगी, एड. एम.ए.पाटील, संजीव साने, आयटक चे लिलेश्वर बंसोड, राज्य सरकारी कर्मचारी संघटनेचे भास्कर गव्हाळे, स्वराज इंडियाचे सुब्रतो भट्टाचार्य, बाल्मिकी विकास संघाचे नरेश भगवाने, म्युनिसिपल लेबर युनियनचे बिरपाल भाल, आणि श्रमिक जनता संघाचे सरचिटणीस जगदीश खैरालिया यांनी केली आहे.
0 टिप्पण्या