सम्यक कोकण कला संस्था (रजि.) महाराष्ट्रतर्फे आयोजित रौप्य महोत्सव, वर्धापन दिन, स्मरणिका व दिनदर्शिका प्रकाशन तसेच सम्यक कला भूषण जीवनगौरव पुरस्कार वितरणाचा भव्य कार्यक्रम सोहळा शनिवार, २९ नोव्हेंबर रोजी दादर (पूर्व) येथील डॉ. बाबासाहेब आंबेडकर भवन येथे संपन्न होणार आहे. यावेळी संस्थेच्या पंचवीस वर्षांच्या सामाजिक, सांस्कृतिक, शैक्षणिक व क्रीडा क्षेत्रातील योगदानाचा आढावा घेतला जाणार आहे. रौप्य महोत्सवी वर्षानिमित्त राज्यभरातील दीडशे ते दोनशे ज्येष्ठ कलावंतांचा सन्मान होणार आहे.अशी माहिती संस्थेचे अध्यक्ष मंदार कवाडे व उपाध्यक्ष विनोद धोत्रे यांनी मुंबई मराठी पत्रकार संघात आयोजित पत्रकार परिषदेत दिली. संस्थेचे अध्यक्ष मंदार कवाडे, उपाध्यक्ष कवी ,गीतकार व संगीतकार विनोद धोत्रे, यांच्यासह सुभाष सावंत, नरेश शिंदे मुकूंद तांबे, चिंतामणी जाधव आदी पदाधिकारी या पत्रकार परिषदेला उपस्थित होते.
रौप्य महोत्सवी वर्षानिमित्त राज्यभरातील दीडशे ते दोनशे ज्येष्ठ कलावंतांचा सन्मान सम्यक कोकण कला संस्कृती मंचतर्फे करण्यात येणार आहे. तसेच संस्थेच्या वार्षिक परंपरेनुसार दिनदर्शिका व स्मरणिकेचे प्रकाशनही या सोहळ्यात होणार आहे. सायंकाळी ४.३० ते ६.३० या वेळेत आकर्षक सम्यक लोककला महोत्सव आयोजित करण्यात आला आहे. तसेच रात्री ८.३० ते ९.३० या वेळेत धम्मदान भोजनाचे आयोजन उद्योजक अमोल रोकडे यांच्या सौजन्याने करण्यात येणार आहे. असे कवाडे यांनी सांगितले.
संस्थेचे सचिव नरेश शिंदे यांनी सांगितले, "गेली पंचवीस वर्षे संस्था सामाजिक, शैक्षणिक आणि सांस्कृतिक उपक्रम राबवत आहे. कला क्षेत्रातील ज्येष्ठ कलावंतांना व्यासपीठ व सन्मान देणे हा आमचा मुख्य उद्देश आहे. आजवर शंभरहून अधिक कलावंतांना मार्गदर्शन आणि मंच देण्यात आला आहे."
0 टिप्पण्या