मुंबईमध्ये गेलच्या मुख्य पाईपलाईनमध्ये बिघाड झाल्यामुळे सीएनजीचा तुटवडा निर्माण झाला आहे, . वडाळा येथील मुख्य पाईपलाईनला झालेल्या तांत्रिक बिघाडामुळे मुंबई, ठाणे आणि नवी मुंबईतील सीएनजीचा पुरवठा खंडित झाला आहे. ज्यामुळे रिक्षा, टॅक्सी, बस आणि खासगी वाहनाचालकांना मोठ्या अडचणींचा सामना करावा लागत आहे. या बिघाडामुळे मुंबई, नवी मुंबई आणि ठाण्यातील अनेक सीएनजी पंपांवर पुरवठा थांबला आहे. दुरुस्तीला २४ ते ३० तास लागू शकतात, त्यामुळे नागरिकांना पर्यायी वाहतूक व्यवस्था वापरण्याची किंवा प्रवासाचे वेळापत्रक बदलण्याची शिफारस केली जात आहे. मात्र महानगर गॅस लिमिटेडने (MGL) आश्वासन दिले आहे की घरगुती पीएनजी (PNG) ग्राहकांना कोणताही व्यत्यय येणार नाही.
दरम्यान, घरगुती वापरकर्त्यांना पाइपद्वारे पीएनजीचा पुरवठा सुरू राहील, असं एमजीएलने स्पष्ट केलं. या अडचणीच्या काळात, निवासी भागातील रहिवाशांची गैरसोय होऊ नये म्हणून पीएनजी पुरवण्याला प्राधान्य देण्यात आलं आहे. त्यामुळे स्वयंपाकासाठी लागणाऱ्या गॅसचा पुरवठा खंडीत होणार नाही. एमजीएलने परिस्थिती सामान्य होईपर्यंत तात्पुरतं पर्यायी इंधन वापरण्याचा सल्ला व्यावसायिक ग्राहकांना दिला आहे. तर खराब झालेल्या पाइपलाइनची दुरुस्ती करण्यासाठी गेल आणि एमजीएलच्या तांत्रिक पथकांना तात्काळ तैनात करण्यात आलं आहे. आरसीएफ परिसरात पाइपलाइन खराब झाली होती, असं मत तज्ज्ञांनी नोंदवलंय. वडाळा सीजीएस इथं पूर्ण क्षमतेनं गॅस पुरवठा पूर्ववत होताच नेटवर्कमधील दाब सामान्य होईल आणि सर्व सीएनजी पंपांवर नियमित पुरवठा पुन्हा सुरू होईल, अशी माहिती एमजीएलने दिली. यावेळी कंपनीने ग्राहकांना संयम राखण्याचं आवाहन केलं आहे.
0 टिप्पण्या