अनंत तरेंचं तेव्हा ऐकलं नाही, याचा पश्चाताप होतोय"

*हाच आपल्याला दगा देईल, असं अनंत तरेंनी आधीच सांगितलं होतं. मात्र, अनंत तरेंचं तेव्हा ऐकलं नाही, याचा पश्चाताप होतोय", असं म्हणत एकनाथ शिंदे यांच्यावर उद्धव ठाकरे यांनी घणाघाती टीका केली. . . शिवसेना उपनेते दिवंगत अनंत तरे ह्यांच्या जीवनावर आधारित त्यांचे सहकारी योगेश कोळी ह्यांनी लिहिलेलं ‘अनंत आकाश’ ह्या पुस्तकाचा प्रकाशन सोहळा पक्षप्रमुख उद्धव ठाकरे ह्यांच्या हस्ते आज ठाण्यातील गडकरी रंगायतन येथे संपन्न झाला. यावेळी ते बोलत होते. यावेळी शिवसेना नेते खासदार अरविंद सावंत, मा.खासदार राजन विचारे, ठाणे जिल्हाप्रमुख. केदार दिघे, भिवंडीचे खासदार सुरेश (बाळ्या) म्हात्रे, महिला संघटक महेश्वरी तरे,  अनंत तरे ह्यांचे कुटुंबीय तसेच इतर पदाधिकारी आणि शिवसैनिक मोठ्या प्रमाणात उपस्थित होते 

उद्धव ठाकरे म्हणाले, आज अनंत तरेंची आठवण येतेय. मला वहिनी म्हणाल्या की ते असते तर त्यांना किती आनंद झाला असता. मी म्हणालो ते असते तर आपल्याला किती आनंद झाला असता. प्रामाणिकपणे अनेकजण गोष्टी सांगत असतात. पण निष्ठेचे मुखवटे घालून बसलेली माणसं आपल्या आजबाजूला इतका वेढा घालून बसतात की नाही म्हटलं तरीही आपल्या लोकांकडे दुर्लक्ष होतं. आता मला नाही म्हटलं तरी पश्चात्ताप होत आहे. तेव्हाच मी अनंत तरेंचं ऐकलं असतं तर आत्ता जरा कुठे गळ्याशी येतं म्हटल्यावर अमित शाह यांच्या चरणी लोटांगण घालून वाचवा वाचवा म्हणत हंबरडा फोडत बसणारी माणसं दिसली नसती.

पुढे बोलताना उद्धव ठाकरे म्हणाले, 2014 साली अनंत तरे निवडणूक लढवणार होते. त्याचवेळी भाजपाने अचानक युती तोडली आणि विधानसभा निवडणुकीची वेळ आली. त्या काळातच शिवसेना संपवण्याचा डाव आखला गेला होता. आपण ठामपणे उभे राहिलो, आपल्या उमेदवारांना उभे केले. त्या वेळी अनंत तरे यांनी अपक्ष म्हणून अर्ज दाखल केला होता. अनेकांनी मला सांगितले की तरे ऐकून घेत नाहीत. तेव्हा लोटांगणवीर माझ्याकडे आले आणि म्हणाले, काहीतरी करा नाहीतर ती जागा हातातून जाईल. मग मी स्वतः तरे यांच्याशी चर्चा करून त्यांना समजावले. आपण भाजपाचे संकट दूर करु, कारण ते आपल्याला संपवण्याच्या तयारीत आहेत, नंतर मानपानाचा विचार करू, असं मी सांगितलं. त्यावर अनंत तरे यांनी मला स्पष्ट सांगितलं होतं की, "हाच माणूस एक दिवस आपल्याला दगा देईल." आणि आज नेमकं तेच घडलं. अनंत तरे नावाचा तो राजहंस आज आपल्यात असता, तर हे कावळे इतके फडफडले नसते, असा टोलाही उद्धव ठाकरे यांनी एकनाथ शिंदे यांना लगावला.: