मराठा आरक्षण आंदोलकांसाठी मुंबई महानगरपालिकेकडून आवश्यक नागरी सेवा-सुविधा

मुंबई  महानगरपालिका मुख्यालयासमोर स्थित, आझाद मैदान येथे मराठा आरक्षण मोर्चाच्या निमित्ताने राज्यभरातून आलेल्या आंदोलकांची संख्या लक्षात घेता, महानगरपालिकेने आवश्यक त्या विविध नागरी सेवा-सुविधा पुरवल्या आहेत.. आझाद मैदान व आजूबाजूच्या परिसरातील ‘पैसे घ्या व वापरा’ तत्वावरील सर्व सार्वजनिक शौचालये ही आंदोलकांच्या वापरासाठी मोफत उपलब्ध करून देण्यात आली आहेत.. आझाद मैदानाच्या आतल्या बाजूस एकूण २९ शौचकुपे असणारे शौचालय आंदोलकांच्या वापरासाठी विनामूल्य उपलब्ध करून देण्यात आले आहे.. आझाद मैदानास लागून असलेल्या महात्मा गांधी मार्गावर प्रत्येकी १० शौचकुपे असणारी एकूण तीन फिरती शौचालये उपलब्ध करून देण्यात आली आहेत.. कार्यकारी अभियंता (परिवहन) (पश्चिम उपनगरे) यांच्या कार्यालयामार्फत आझाद मैदानातील मेट्रो साइटच्या बाजूला एकूण १२ फिरती (पोर्टेबल) शौचालये पुरविण्यात आली आहेत. तसेच आणखी शौचालये पुरविण्यात येत आहेत.

 आंदोलनस्थळी आंदोलकांना पिण्याच्या पाण्यासाठी एकूण ६ टॅंकर्स पुरविण्यात आले आहेत. तसेच अतिरिक्त टॅंकर्स मागविण्यात आले आहेत.. पावसामुळे आंदोलन स्थळी मैदानावर चिखल होत होता. नागरिकांना इजा होवू नये यासाठी, आंदोलन स्थळी प्रवेशमार्गामध्ये झालेला चिखल हटवून, त्या मार्गिकेवर २ ट्रक खडी टाकून रस्ता समतल करण्यात आला आहे.. वैद्यकीय आरोग्य विभागामार्फत नागरिकांच्या उपचार व वैद्यकीय तपासणीसाठी वैद्यकीय मदत कक्ष उभारण्यात आला आहे. तसेच १०८ रुग्णवाहिका सेवा उपलब्ध करुन देण्यात आली आहे.. पावसाळी स्थिती लक्षात घेता, आझाद मैदान व आजूबाजूच्या परिसरात कीटकनाशक धूम्रफवारणी करण्यात आली आहे.. आंदोलन स्थळ व संपूर्ण आजूबाजूच्या परिसरात पुरेशा संख्येने कर्मचारी नेमून स्वच्छता करण्यात येत आहे.