मुंबई महानगरपालिका भ्रष्टाचाराच्या गाळात... कंत्राटदार आणि अधिकारी मिळून करताहेत प्रचंड लूट

 मिठी नदीतील गाळ काढण्याबावत व मुंबई शहारातील मेजर नाल्यातील साफसफाई करणेबाबत निविदेतील होत असणारा घोटाळा आणि यामध्ये सहभागी असलेले महानगरपालिकेचे अधिकारी याबाबतचा पर्दाफाश आज मनसे नेते बाळा नांदगावकर यांनी केला. कंत्राटदार आणि अधिकारी वर्ग यांच्या अभद्र युतीमुळे महानगरपालिकेची कोट्यावधी रुपयांची लूट सुरू असल्याचा आरोपही त्यांनी आज प्रसार माध्यमांशी बोलताना केला. मुंबई मराठी पत्रकार संघ येथे झालेल्या पत्रकार परिषदेत त्यांनी या भ्रष्टाचाराची सर्व माहिती दिली्

 मुंबई शहरातील डिसल्टींग (Desilting) मेजर नालासफाई २०२५, २०२६, २०२७ याबाबतीत साधारण २०० कोटीहून अधिक रकमेच्या निविदा काढण्यात आल्या आहेत आणि आता १०० कोटी रकमेची  मिठी नदी साफसफाईची निविदा काढण्यात आली आहे ही निविदा काढण्यात येऊ नये असे पत्र आपण मुख्यमंत्री आणि महापालिका आयुक्त यांना पाठवले असल्याचे त्यांनी सांगितले . कारण मुंबईतील मेजर नालासफाई व मिठी नदी सफाई याकरिता काढण्यात येणाऱ्या निविदेमध्ये साधारणतः एकाच कंत्राटदाराच्या ४ ते ५ कंपन्यांचा सहभाग असून त्यांनाच निविदा मिळेल अशाप्रकारची अट दिलेली आहे. मागच्या वर्षी कोणतीही काम करणार कंपनी निविदा भरु शकत होती (रस्ते बनवणारी, बांधकाम करणारी इत्यादी सर्व कामे करणारी) मात्र यावर्षी केवळ एकाच कंत्राटदाराला नजरेसमोर ठेवून त्यालाच निविदा मिळेल अशाप्रकारची अट (Terms) ठेवण्यात आली आहे. ही अट अशी की, केवळ डिसटींग काम करणाऱ्या कंपनीला निविदा दिली जाईल. त्यात एकाच कंत्राटदाराच्या १) डी.बी. इंटरप्रायझेस, २) एन.एस. रनोजा डेव्हलपमेंट कार्पोरेशन, ३) त्रिदेव इन्फ्राप्रोजेक्ट, ४) तनिषा इंटरप्रायझेस यांनांच काम मिळेल अशाप्रकारची अट टाकून महानगरपालिका आणि सरकारचे नुकसान केले जात आहे. 

कारण हे सर्व टेंडर जास्त किंमतीने (Above) दिले जात आहे. त्यामुळे महानगरपालिका व सरकारचे किमान २०० कोटीचे नुकसान होत आहे. कंत्राटदाराला साधारणतः१,०००/- खर्च होत आहे व त्याला रु.१,५००/- जास्त फायदा होत आहे. पैशांची लूट होत आहे. हा पैसा मुंबईकरांच्या खिशातील आहे. ती निविदा ताबडतोब थांबवून अटी (Terms) बदलून सर्वांसाठी खुली करावी व मुंबईकरांच्या पैशांची होणारी लूट थांबवावी. महापालिकेतील रामगुडे नावाचा असिस्टंट इंजिनियर, केतन कदम नावाचा मशिन सप्लायर, भूपेंद्र, नंदीश नावाचे कंत्राटदार अशा या घोटाळाबहाद्दरांची नावं देखील नांदगांवकरांनी उघड केली.  याकरिता (Above) निविदा भरणाऱ्या कंपन्या याचा पूर्वीचा इतिहास काढून किती लूट झालेली आहे याची पूर्णतः एस.आय.टी. नेमून चौकशी करावी व या कंपन्या व त्यांचे मालक दोषी आढळल्यास त्यांच्या कंपन्या ब्लॅक लिस्टेट करुन फौजदारी गुन्हे दाखल करावे.  याबाबत सन्माननीय अतिरिक्त आयुक्त . अजित बांगर  यांच्याशी दूरध्वनीवरुन माहिती दिली असून याची गंभीर दखल घेऊन झालेली निविदा ताबडतोब थांबवून पारदर्शीपणे निविदा काढण्यात याव्यात, दोषी कंत्राटदार, महापालिका अधिकाऱ्यांविरोधात फौजदारी गुन्हा दाखल करण्याची मागणी नांदगांवकर यांनी केली आहे.